"ஈரான் மீது மீண்டும் தாக்குதல் நடத்துவோம்.." எச்சரிக்கும் டொனால்டு டிரம்ப்!

அமைதி ஒப்பந்தத்திற்கு ஈரான் வரத் தவறினால், அந்நாட்டின் மீது மீண்டும் ராணுவத் தாக்குதல்களை நடத்த நேரிடும் என்று அமெரிக்க அதிபர் டொனால்ட் டிரம்ப் எச்சரித்துள்ளார்.

ஃப்ளோரிடாவில் நடைபெற்ற தேர்தல் பிரசாரக் கூட்டத்தில் பேசிய டிரம்ப், ஈரான் புத்திசாலித்தனமாகச் செயல்பட்டு ஒப்பந்தத்திற்கு முன்வர வேண்டும் என்றும், தவறினால் "சிறிய அளவிலான எபிக் ஃபியூரி" (Epic Fury) தாக்குதல் நடத்தப்படும் என்றும் குறிப்பிட்டார். இருப்பினும், தாக்குதலைத் தவிர்க்க ஈரான் என்னென்ன நிபந்தனைகளை ஏற்க வேண்டும் என்பதை அவர் தெளிவாகக் குறிப்பிடவில்லை.

முன்னதாக, அமெரிக்காவும் இஸ்ரேலும் இணைந்து பிப்ரவரி மாதம் நடத்திய 'ஆபரேஷன் எபிக் ஃபியூரி' தாக்குதலில் ஈரானின் முன்னாள் உச்ச தலைவர் ஆயதுல்லா அலி கமேனி மற்றும் அவரது குடும்பத்தினர் உயிரிழந்தனர். மேலும், 'ஆபரேஷன் மிட்நைட் ஹேமர்' மூலம் ஈரானின் அணுசெறிவூட்டல் மையங்கள் அழிக்கப்பட்டு, அதன் ராணுவமும் பொருளாதாரமும் பலவீனப்படுத்தப்பட்டுள்ளதாக டிரம்ப் தெரிவித்துள்ளார். ஈரானை அணுஆயுதம் பெற விடாமல் தடுப்பதே தங்கள் முதன்மை நோக்கம் என்றும் அவர் கூறினார்.

டொனால்ட் டிரம்பின் இந்த அறிவிப்புக்குச் சில மணி நேரங்களுக்கு முன்பு, துருக்கிக்கான அமெரிக்கத் தூதர் டாம் பாரக் (Tom Barrack) பேட்டி ஒன்றில் பேசுகையில், வரும் வார இறுதியில் ஈரான் மீது மீண்டும் தாக்குதல் நடத்தப்பட வாய்ப்புள்ளதாகக் குறிப்பிட்டிருந்தார். ஆனால், இந்தத் தகவல் குறித்துத் தனக்கு எதுவும் தெரியாது என்று டிரம்ப் சுருக்கமாகக் கூறிவிட்டார். அதேசமயம், ஈரானுடனான இந்தப் போர் விரைவில் ஏதேனும் ஒரு வழியில் முடிவுக்கு வரும் என்றும் அவர் நம்பிக்கை தெரிவித்துள்ளார்.

அமெரிக்காவின் இந்த அச்சுறுத்தலுக்குப் பதிலடி கொடுத்துள்ள ஈரான், அமெரிக்கா "தீயோடு விளையாடக் கூடாது" என்று எச்சரித்துள்ளது. அமெரிக்காவோ அல்லது இஸ்ரேலோ மீண்டும் தாக்குதல் நடத்தினால், அரபிக் வளைகுடாவில் உள்ள கடலடித் தகவல் தொடர்பு கேபிள்களை (Undersea Cables) இலக்கு வைத்துத் தாக்குவோம் என்றும், இணையச் சேவைகள் நீண்ட நாட்களுக்குத் துண்டிக்கப்படும் வகையில் அதன் பழுதுபார்ப்புப் பணிகளையும் தடுப்போம் என்றும் ஈரான் அதிகாரி ஒருவர் தெரிவித்துள்ளார்.

அமெரிக்க அதிகாரிகளைக் குறிவைத்து ஈரான் சில திட்டங்களைத் தீட்டி வருவதாக அமெரிக்க உளவுத்துறை எச்சரித்துள்ளது. இதனையடுத்து, சவூதி அரேபியா, ஐக்கிய அரபு அமீரகம், லெபனான், கத்தார் மற்றும் ஜோர்டான் ஆகிய நாடுகளில் உள்ள அமெரிக்கத் தூதரகங்களில் பணியாற்றும் அத்தியாவசியமற்ற ஊழியர்கள் மற்றும் தூதர்கள் உடனடியாக வெளியேற்றப்பட்டு பாதுகாப்பு பலப்படுத்தப்பட்டு வருகிறது.