மடப்புரம் காவலாளி கொலை வழக்கு: டி.எஸ்.பி-க்கு பிடிவாரண்ட்- நீதிமன்றம் உத்தரவு!

சிவகங்கை மாவட்டம் திருப்புவனம் தாலுகா மடப்புரம் காளியம்மன் கோவில் காவலாளி அஜித் குமார் கொல்லப்பட்ட வழக்கில், காவல்துறையினரே குற்றச்சாட்டிற்கு உள்ளாகியிருப்பது பெரும் பரபரப்பை ஏற்படுத்தியுள்ளது. இந்த வழக்கில் ஏற்கனவே 5 போலீசார் கைது செய்யப்பட்டுள்ள நிலையில், தற்போது முன்னாள் டி.எஸ்.பி சண்முகசுந்தரத்தைச் சுற்றியும் சட்ட நடவடிக்கை இறுக்கமடைந்துள்ளது.

வழக்கின் பின்னணி மற்றும் சி.பி.ஐ விசாரணை

இந்தக் கொலை வழக்கு தொடர்பாகத் திருப்புவனம் காவல் நிலையத்தில் பணியாற்றிய 5 போலீசார் கைது செய்யப்பட்டு மதுரை மத்திய சிறையில் அடைக்கப்பட்டுள்ளனர். மானாமதுரை டி.எஸ்.பி-யாக இருந்த சண்முகசுந்தரம் இந்தப் புகாரின் அடிப்படையில் பணியிடை நீக்கம் செய்யப்பட்டார். தற்போது இந்த வழக்கு சி.பி.ஐ வசம் ஒப்படைக்கப்பட்டு விசாரணை நடைபெற்று வருகிறது.

ஜாமீன் மறுப்பும் நீதிமன்ற உத்தரவும்

டி.எஸ்.பி சண்முகசுந்தரம் தாக்கல் செய்த முன்ஜாமீன் மனுக்கள் உயர்நீதிமன்ற மதுரை கிளையில் இருமுறை தள்ளுபடி செய்யப்பட்டன. ஜாமீன் மனு விசாரணையின் போது, சி.பி.ஐ தாக்கல் செய்த கூடுதல் குற்றப்பத்திரிகையில் சண்முகசுந்தரம் உள்ளிட்ட 4 பேரையும் சேர்த்து விசாரிக்கவும், வழக்கை 6 மாதங்களுக்குள் முடிக்கவும் நீதிமன்றம் உத்தரவிட்டிருந்தது.

ஆஜராகாத டி.எஸ்.பி-க்கு பிடிவாரண்ட்

கூடுதல் குற்றப்பத்திரிகையில் பெயர் சேர்க்கப்பட்ட சண்முகசுந்தரம் உள்ளிட்ட 4 பேரும் மதுரை மாவட்ட நீதிமன்றத்தில் நேரில் ஆஜராகுமாறு ஏற்கனவே உத்தரவிடப்பட்டிருந்தது. ஆனால், நீதிமன்ற விசாரணைக்கு சண்முகசுந்தரம் ஆஜராகவில்லை. இதனைத் தொடர்ந்து, நீதிபதி அவருக்கு எதிராகப் பிடிவாரண்ட் பிறப்பித்து அதிரடி உத்தரவிட்டுள்ளார். சி.பி.ஐ மற்றும் தமிழக காவல்துறை இணைந்து வரும் மார்ச் 5-ஆம் தேதிக்குள் சண்முகசுந்தரத்தைப் பிடித்து நீதிமன்றத்தில் ஆஜர்படுத்த வேண்டும் என்று அந்த உத்தரவில் குறிப்பிடப்பட்டுள்ளது.