இனி ரீசார்ஜ் செய்வது சுலபம் ! தொலைத்தொடர்பு நிறுவனங்களுக்கு TRAI வைத்த செக் !

ப்ரீபெய்டு ரீசார்ஜ் செய்யும் போது தங்களுக்கு தேவையான குறிப்பிட்ட வவுச்சர்களை தேடிக் கண்டுபிடிப்பதில் நுகர்வோர் எதிர்கொள்ளும் சிரமங்களுக்கு தீர்வு காணும் வகையில், தொலைத்தொடர்பு சேவை வழங்குநர்களுக்கு இந்திய தொலைத்தொடர்பு ஒழுங்குமுறை ஆணையம் (TRAI) புதிய உத்தரவை பிறப்பித்துள்ளது.

இதன்படி, அனைத்து தொலைத்தொடர்பு நிறுவனங்களும் தங்களது இணையதளங்கள் மற்றும் மொபைல் செயலிகளில் “TRAI-ஆல் கட்டாயமாக்கப்பட்ட பேக்குகள்” என்ற பெயரில் தனிப்பட்ட மற்றும் எளிதில் அடையாளம் காணக்கூடிய பகுதியை உருவாக்க வேண்டும் என அறிவுறுத்தப்பட்டுள்ளது.

நுகர்வோரின் சிரமம் என்ன ?

தொலைத்தொடர்பு நிறுவனங்களின் இணையதளங்கள் மற்றும் செயலிகளில் பல்வேறு ரீசார்ஜ் திட்டங்கள் இடம்பெற்றுள்ளன. இதில் TRAI விதிமுறைகளின்படி வழங்கப்பட வேண்டிய குறிப்பிட்ட வவுச்சர்களை நுகர்வோர் எளிதில் கண்டறிய முடியாத நிலை இருப்பதாக புகார்கள் எழுந்தன.

சில நிறுவனங்களின் தளங்களில் இந்த வவுச்சர்கள் தனியாக முன்னிலைப்படுத்தப்படாமல், பல்வேறு பிரிவுகளுக்குள் வைக்கப்பட்டிருந்ததாகவும், அவற்றை கண்டுபிடிக்க பயனர்கள் பல பக்கங்கள் அல்லது திரைகளுக்குச் செல்ல வேண்டிய நிலை ஏற்பட்டதாகவும் கூறப்பட்டது.

இதனால் தங்களுக்குத் தேவையான திட்டத்தைத் தேர்வு செய்வதிலும், அதற்கான ரீசார்ஜை மேற்கொள்வதிலும் நுகர்வோர் சிரமங்களை எதிர்கொண்டனர்.

டிராய் நடத்திய ஆய்வில் வெளியான தகவல் :

நுகர்வோரிடமிருந்து கிடைத்த புகார்களைத் தொடர்ந்து, பல்வேறு தொலைத்தொடர்பு சேவை நிறுவனங்களின் இணையதளங்கள் மற்றும் மொபைல் செயலிகளை TRAI ஆய்வு செய்தது.

இந்த ஆய்வில், கட்டுப்பாட்டு அமைப்பு பரிந்துரைத்த அல்லது கட்டாயப்படுத்திய வவுச்சர்கள் பெரும்பாலான தளங்களில் போதுமான முக்கியத்துவத்துடன் காட்சிப்படுத்தப்படவில்லை என்பது தெரியவந்ததாக TRAI தெரிவித்துள்ளது.

மேலும், சில இடங்களில் இந்தத் திட்டங்கள் வேறு பெயர்களிலான பிரிவுகளுக்குள் இடம்பெற்றிருந்ததுடன், அவற்றை அணுகுவதற்கு பயனர்கள் பல்வேறு மெனுக்கள் மற்றும் திரைகளை கடந்து செல்ல வேண்டியிருந்ததாகவும் தெரிவிக்கப்பட்டுள்ளது.

முதல் டேபிலேயே இருக்க வேண்டும் !

இதையடுத்து, தொலைத்தொடர்பு நிறுவனங்களுக்கு TRAI முக்கியமான வழிகாட்டுதலை வழங்கியுள்ளது.

புதிய உத்தரவின்படி, ஒவ்வொரு தொலைத்தொடர்பு நிறுவனத்தின் இணையதளம் மற்றும் மொபைல் செயலியில் உள்ள ப்ரீபெய்டு ரீசார்ஜ் பிரிவில் “TRAI-ஆல் கட்டாயமாக்கப்பட்ட பேக்குகள்” என்ற பகுதி அல்லது டேப் முதன்மையாக இடம்பெற வேண்டும்.

அதாவது, நுகர்வோர் ரீசார்ஜ் பிரிவுக்குச் சென்றவுடன் இந்தப் பகுதியை எளிதாகக் கண்டறியும் வகையில் அது தெளிவாகக் காட்சிப்படுத்தப்பட வேண்டும்.

பல்வேறு வவுச்சர்கள் ஒரே இடத்தில் :

TRAI கட்டாயப்படுத்திய பல்வேறு வகையான வவுச்சர்கள் மற்றும் ரீசார்ஜ் திட்டங்கள் இந்தப் பிரத்யேகப் பகுதியில் இடம்பெற வேண்டும் என உத்தரவிடப்பட்டுள்ளது.

இதன் மூலம் குறிப்பிட்ட வவுச்சரை தேடி பல்வேறு பக்கங்களில் அலைய வேண்டிய அவசியம் நுகர்வோருக்கு இருக்காது. தங்களுக்கு தேவையான திட்டத்தை ஒரே இடத்தில் பார்த்து, அதன் விவரங்களை அறிந்து ரீசார்ஜ் செய்யும் வசதி கிடைக்கும்.

விற்பனை நிலையங்களிலும் முக்கியத்துவம் :

இணையதளங்கள் மற்றும் மொபைல் செயலிகளுக்கு மட்டுமின்றி, தொலைத்தொடர்பு நிறுவனங்களின் பிரத்யேக விற்பனை நிலையங்களிலும் இந்த TRAI கட்டாய வவுச்சர்கள் முக்கியமாகக் காட்சிப்படுத்தப்பட வேண்டும் என அறிவுறுத்தப்பட்டுள்ளது.

இதன் மூலம் ஆன்லைன் ரீசார்ஜ் மட்டுமின்றி, நேரடியாக விற்பனை நிலையங்களுக்குச் சென்று ரீசார்ஜ் செய்யும் நுகர்வோரும் இந்தத் திட்டங்களை எளிதில் அறிந்துகொள்ள முடியும்.

நுகர்வோருக்கு என்ன பயன் ?

TRAI-யின் இந்த நடவடிக்கையால் ரீசார்ஜ் திட்டங்களில் வெளிப்படைத்தன்மை அதிகரிக்கும் என எதிர்பார்க்கப்படுகிறது.

குறிப்பாக, தங்களுக்கு கிடைக்க வேண்டிய அல்லது TRAI விதிமுறைகளின் கீழ் வழங்கப்படும் குறிப்பிட்ட வவுச்சர்களை நுகர்வோர் எளிதாகக் கண்டறிய முடியும். தேவையற்ற தேடல் மற்றும் பல்வேறு மெனுக்களைக் கடந்து செல்லும் சிரமமும் குறையும்.

நுகர்வோர் உரிமைகள் மற்றும் தகவல் வெளிப்படைத்தன்மையை மேம்படுத்தும் நோக்கில் இந்த உத்தரவு முக்கிய நடவடிக்கையாக பார்க்கப்படுகிறது.