தமிழ் சினிமாவின் புகழ் பெற்ற இசையமைப்பாளர் தேவாவின் சகோதரரும், பிரபல இசையமைப்பாளருமான சபேஷ் இன்று உடல்நலக்குறைவு காரணமாகச் சென்னையில் காலமானார். அவருக்கு வயது 68.

சபேஷ்-முரளி குழு

இசையமைப்பாளர் தேவாவின் சகோதரர்களான சபேஷ் மற்றும் முரளி இருவரும் இணைந்து சபேஷ்-முரளி என்ற இரட்டை இசையமைப்பாளர் குழுவாகப் பல திரைப்படங்களுக்கு இசையமைத்துள்ளனர். இவர்கள் தேவாவின் திரைப்படங்களில் இசை உதவிப் பணிகளையும் திறம்படச் செய்து வந்துள்ளனர்.

உடல்நலக்குறைவு காரணமாகச் சிகிச்சை பெற்று வந்த சபேஷ், சிகிச்சை பலனின்றி இன்று ஆழ்வார்திருநகரில் உள்ள அவரது இல்லத்தில் உயிர் பிரிந்தது.

இசையமைத்த முக்கியப் படங்கள்

சபேஷ் தனது சகோதரர் முரளியுடன் இணைந்து, 'சமுத்திரம்', 'மாயாண்டி குடும்பத்தார்', 'தவமாய் தவமிருந்து', 'பொக்கிஷம்' உள்ளிட்ட பல திரைப்படங்களுக்கு மறக்க முடியாத பாடல்களையும் பின்னணி இசையையும் அமைத்துள்ளார். மேலும், இவர் திரைப்பட இசையமைப்பாளர் சங்கத்தின் தலைவராகவும் இருந்துள்ளார்.

சமீபத்தில், தனது சகோதரர் தேவா தேசிய விருது பெறாதது குறித்து சபேஷ் வருத்தம் தெரிவித்திருந்தார் என்பது குறிப்பிடத்தக்கது.

இசையமைப்பாளர் சபேஷின் திடீர் மறைவு திரையுலகினர் மத்தியில் பெரும் அதிர்ச்சியையும் சோகத்தையும் ஏற்படுத்தியுள்ளது. அவரது மறைவுக்குப் பல திரையுலகப் பிரபலங்கள் இரங்கல் தெரிவித்து வருகின்றனர்.