ஈரானுடன் பேச்சுவார்த்தை நடத்த திட்டமில்லை.. அமெரிக்க அதிபர் டிரம்ப் திட்டவட்டம்!

ஈரானுடன் எந்தவிதப் பேச்சுவார்த்தையும் நடைபெறவில்லை என்றும், ஹோர்முஸ் ஜலசந்தி திறக்கப்பட்டுச் செயல்பட்டு வருகிறது என்றும் அமெரிக்க அதிபர் டொனால்ட் டிரம்ப் தெரிவித்துள்ளார். இதன்மூலம், அந்தச் சர்வதேசப் நீர்வழிப்பாதை கப்பல் போக்குவரத்திற்கு இன்னும் மூடப்பட்டிருப்பதாகத் ஈரான் கூறியிருந்த கூற்றை அவர் மறுத்துள்ளார்.

சுமார் ஆறு மாதங்களாக நீடித்து வரும் இப்போரை முடிவுக்குக் கொண்டுவரும் முயற்சிகள் பின்னடைவைச் சந்தித்துள்ளன. அமெரிக்கா - ஈரான் இடையிலான தற்காலிகப் போர்நிறுத்த ஒப்பந்தம் முடிவுக்கு வந்த மறுநாளே இந்த முரண்பாடான தகவல்கள் வெளியாகியுள்ளன. இதன் எதிரொலியாகச் சர்வதேசச் சந்தையில் கச்சா எண்ணெய் விலை மீண்டும் உயர்ந்துள்ளதுடன், பங்குச்சந்தைகள் சரிவைச் சந்தித்துள்ளன. மேலும் அமெரிக்கா உள்ளிட்ட முக்கிய நாடுகளின் கடன் வாங்கும் செலவுகளும் பல தசாப்தங்களில் இல்லாத அளவிற்கு உயர்ந்துள்ளன.

தனது 'ட்ரூத் சோஷியல்' (Truth Social) பக்கத்தில் பதிவிட்டுள்ள டிரம்ப், ஈரானுடன் தற்போதோ அல்லது எதிர்காலத்திலோ பேச்சுவார்த்தை நடத்துவதற்கான எந்தத் திட்டமும் இல்லை எனத் தெரிவித்துள்ளார். அமெரிக்கக் கடற்படையின் முற்றுகை தொடர்ந்து அமலில் உள்ளதாகவும், நீரில் வைக்கப்பட்டிருந்த கண்ணிவெடிகள் அகற்றப்பட்டு ஹோர்முஸ் ஜலசந்தி பாதுகாப்பாக இயங்கி வருவதாகவும் அவர் குறிப்பிட்டுள்ளார்.

எனினும், ஈரானுடனான பேச்சுவார்த்தை எப்போதும் இல்லாத அளவிற்கு வலுவாக நடைபெற்று வருவதாக டிரம்பின் சிறப்புத் தூதர் ஜாரெட் குஷ்னர் கடந்த 17 ஆம் தேதி தெரிவித்திருந்த நிலையில், டிரம்பின் இந்த அறிக்கை அதற்கு முரண்பாடாக அமைந்துள்ளது.