LIVE 24 X 7
கமல்ஹாசன் - இயக்குநர் எஸ்.யு. அருண்குமார் கூட்டணியில் உருவாகும் புதிய படத்தின் தலைப்பு மற்றும் ஃபர்ஸ்ட் லுக் போஸ்டர் நவம்பர் 6ஆம் தேதி அறிவிக்கப்பட்டது. கமல்ஹாசனின் பிறந்தநாளை முன்னிட்டு வெளியான இந்த அறிவிப்பில், ‘சண்டியர்’ என்ற பெயர் இடம்பெற்றிருந்தது. இதையடுத்து, புதிய தமிழகம் கட்சித் தலைவர் டாக்டர் கிருஷ்ணசாமி உள்ளிட்டோர் எதிர்ப்பு தெரிவித்துள்ளனர்.
2003-ல் வெடித்த சர்ச்சை... ‘விருமாண்டி’ ஆன சண்டியர்!
கடந்த 2003ஆம் ஆண்டு கமல்ஹாசன் எழுதி, இயக்கி, நடித்த படத்துக்கு முதலில் ‘சண்டியர்’ என்றே பெயரிடப்பட்டது. ஆனால், அந்தப் பெயர் குறிப்பிட்ட சமூகத்தின் ஆதிக்கத்தையும் சாதிய வன்முறையையும் பெருமைப்படுத்துவதாக இருக்கலாம் என்றும், தென் மாவட்டங்களில் சமூகப் பதற்றத்தை ஏற்படுத்த வாய்ப்புள்ளதாகவும் புதிய தமிழகம் கட்சித் தலைவர் கிருஷ்ணசாமி எதிர்ப்பு தெரிவித்தார்.
அப்போது படப்பிடிப்பைத் தடுத்து நிறுத்தும் போராட்டங்கள் நடத்தப்படும் என்ற எச்சரிக்கைகளும் எழுந்தன. இந்த விவகாரம் அப்போதைய முதலமைச்சர் ஜெயலலிதாவின் கவனத்துக்கும் சென்றது. தொடர்ந்து, படத்தின் தலைப்பு ‘விருமாண்டி’ என மாற்றப்பட்டது. 2004ஆம் ஆண்டு வெளியான அந்தப் படம் ரசிகர்களிடையே வரவேற்பைப் பெற்றது.
மீண்டும் அதே பெயர்... கிருஷ்ணசாமி எதிர்ப்பு!
இப்போது 23 ஆண்டுகளுக்குப் பிறகு அதே ‘சண்டியர்’ தலைப்பை கமல்ஹாசன் மீண்டும் பயன்படுத்தியுள்ளார். இதற்கு எதிர்ப்பு தெரிவித்துள்ள கிருஷ்ணசாமி, இந்தப் பெயர் சாதிய மோதல்களுக்கும் வன்முறைக்கும் வழிவகுக்கலாம் எனக் குற்றம்சாட்டியுள்ளார். கமல்ஹாசன் அரசியல் கட்சித் தலைவராகவும் நாடாளுமன்ற உறுப்பினராகவும் இருப்பதால், சாதி, மதம் சார்ந்த அடையாளங்களைத் தவிர்த்து பொறுப்புடன் செயல்பட வேண்டும் என்றும் அவர் வலியுறுத்தியுள்ளார்.
‘சண்டியர்’ என்ற சொல்லில் சாதிய அடையாளம் இருக்கிறதா?
இந்த எதிர்ப்பின் பின்னணியில் ஒரு முக்கியமான கேள்வி எழுகிறது. ‘சண்டியர்’ என்ற சொல் வெறும் முரட்டுத்தனமான அல்லது அடங்காத குணம் கொண்ட ஒருவரைக் குறிக்கும் சொல்லா? அல்லது தமிழ்நாட்டின் குறிப்பாகத் தென் மாவட்டங்களின் சமூகச் சூழலில், அது குறிப்பிட்ட சாதியின் ஆதிக்கம், சாதிப் பெருமை, அரிவாள் கலாசாரம் போன்றவற்றுடன் தொடர்புபடுத்திப் பார்க்கப்படுகிறதா?
கிருஷ்ணசாமி உள்ளிட்ட எதிர்ப்பாளர்களின் வாதம், இந்தச் சொல்லைத் தனியாகப் பார்க்க முடியாது என்பதுதான். ஒரு திரைப்படத்தின் தலைப்புடன் அதன் போஸ்டர், கதைக்களம், காட்சிப்படுத்தப்படும் வன்முறை ஆகியவையும் சேரும்போது, அது சமூகத்தில் எத்தகைய செய்தியை உருவாக்குகிறது என்பதையும் கவனிக்க வேண்டும் என அவர்கள் கருதுகின்றனர். குறிப்பாக, தென் மாவட்டங்களில் ஏற்கெனவே சாதி அடையாளம் தொடர்பான பதற்றங்கள் நிலவிய வரலாற்றைச் சுட்டிக்காட்டி இந்த எதிர்ப்பு முன்வைக்கப்படுகிறது.
கமல் நடிப்பதால் மட்டுமே எதிர்ப்பா?
மறுபுறம், ‘சண்டியர்’ என்ற பெயரில் 2014ஆம் ஆண்டிலேயே சோழதேவன் இயக்கத்தில் ஜெகன் உள்ளிட்டோர் நடித்த திரைப்படம் வெளியாகியுள்ளது. அப்போது இதே அளவிலான சர்ச்சை எழுந்ததாகத் தெரியவில்லை. இதனால், ஒரு சொல்லுக்கு எதிர்ப்பு தெரிவிப்பதில் அதன் பயன்பாட்டுச் சூழலும், அதை யார் பயன்படுத்துகிறார்கள் என்பதும் முக்கியமாகிறதா என்ற கேள்வி எழுகிறது.
கமல்ஹாசன் ஏற்கெனவே இதே தலைப்பைத் தனது படத்துக்குச் சூட்ட முயன்றபோது எதிர்ப்பு எழுந்தது. இப்போது அதே பெயரை மீண்டும் தேர்வு செய்திருப்பதால், பழைய சர்ச்சையும் அரசியல் பின்னணியும் மீண்டும் விவாதத்துக்கு வந்துள்ளன. இதை வெறும் கமல்ஹாசனுக்கு எதிரான அரசியல் எதிர்ப்பாக மட்டும் பார்க்க முடியுமா அல்லது அந்தச் சொல்லுக்குப் பின்னால் உள்ள சமூகப் பொருளையும் விவாதிக்க வேண்டுமா என்பதே இப்போதைய கேள்வி.
தலைப்பால் மட்டும் சாதிக் கலவரம் ஏற்படுமா?
ஒரு திரைப்படத்தின் தலைப்பு மட்டுமே சாதிக் கலவரத்தை ஏற்படுத்திவிடும் என்று உறுதியாகக் கூற முடியாது. அதே நேரத்தில், சமூகத்தில் ஏற்கெனவே சர்ச்சைக்குரிய பொருளைக் கொண்ட ஒரு சொல்லைப் பயன்படுத்தும்போது, அதன் தாக்கம் குறித்து கேள்விகள் எழுவதையும் புறக்கணிக்க முடியாது. ஒரு திரைப்படத்தின் கலைச் சுதந்திரம், படைப்பாளியின் கருத்துச் சுதந்திரம் ஆகியவற்றுடன் சமூகப் பொறுப்பும் விவாதிக்கப்பட வேண்டிய அம்சங்கள்தான்.
2014ஆம் ஆண்டு இதே பெயரில் திரைப்படம் வெளியானது ஒரு பக்கம் இருக்க, 2003ஆம் ஆண்டு கமல்ஹாசனின் படத்துக்கு எதிர்ப்பு எழுந்த வரலாறும் மறுபக்கம் இருக்கிறது. எனவே, ‘சண்டியர்’ என்ற பெயர் உண்மையிலேயே சாதிய ஆதிக்கத்தையும் வன்முறையையும் ஊக்குவிக்கிறதா, அல்லது பழைய அரசியல் சர்ச்சை மீண்டும் உயிர்ப்பிக்கப்பட்டுள்ளதா என்ற விவாதம் இப்போது மையமாகியுள்ளது. படத்தின் கதைக்களம் மற்றும் காட்சிகள் வெளியாகும்போதுதான் இந்த விவாதத்துக்கு இன்னும் தெளிவான பின்னணி கிடைக்கலாம்.
