பண்டிகை காலம்: நாமக்கல்லில் முட்டை கொள்முதல் விலை வரலாறு காணாத புதிய உச்சம்!

நாமக்கல் மண்டலத்தில் முட்டை கொள்முதல் விலை இன்று மேலும் உயர்த்தப்பட்டு, கோழிப் பண்ணை வரலாற்றில் இல்லாத புதிய உச்சத்தை எட்டியுள்ளது.

நாமக்கல் மண்டலத்தின் உற்பத்தி நிலவரம்

நாமக்கல் மண்டலத்தில் 1,100-க்கும் மேற்பட்ட கோழிப்பண்ணைகள் அமைந்துள்ளன. இங்கு சுமார் 7 கோடிக்கும் அதிகமான முட்டைக் கோழிகள் வளர்க்கப்படுவதால், தினசரி சுமார் 6 கோடி முட்டைகள் உற்பத்தி செய்யப்படுகின்றன. இவ்வாறு உற்பத்தி செய்யப்படும் முட்டைகள் தமிழக அரசின் சத்துணவுத் திட்டத்திற்கும், வெளிநாடுகளுக்கும் ஏற்றுமதியாகின்றன. அத்துடன், கேரளா, கர்நாடகா உள்ளிட்ட வெளி மாநிலங்களுக்கும், தமிழகத்தின் பல்வேறு மாவட்டங்களுக்கும் விற்பனைக்காக அனுப்பி வைக்கப்படுகின்றன.

முட்டை கொள்முதல் விலை உயர்வு

சமீப நாட்களாக நாமக்கல் மண்டலத்தில் முட்டை கொள்முதல் விலை தொடர்ந்து அதிகரித்து வருகிறது. இந்த நிலையில், நாமக்கல்லில் இன்று நடைபெற்ற தேசிய முட்டை ஒருங்கிணைப்புக் குழு (NECC) கூட்டத்தில், முட்டை விலையை மேலும் 5 காசுகள் உயர்த்த முடிவு செய்யப்பட்டது. இதனால், நேற்று வரை ரூ.6.25 காசுகளாக இருந்து வந்த முட்டை கொள்முதல் விலை, இன்று ரூ.6.30 காசுகளாக அதிகரித்துள்ளது. இந்த விலை உயர்வு, நாமக்கல் மண்டலக் கோழிப் பண்ணை வரலாற்றில் இதுவரை இல்லாத புதிய உச்சமாகும்.

பண்ணையாளர்கள் மகிழ்ச்சி

தேவை அதிகரிப்பின் காரணமாகவே முட்டை கொள்முதல் விலை கிடுகிடுவென உயர்ந்து வருவதாகப் பண்ணையாளர்கள் மகிழ்ச்சியுடன் தெரிவித்துள்ளனர். மேலும், கிறிஸ்துமஸ் மற்றும் புத்தாண்டு பண்டிகைகள் முடியும் வரை முட்டை கொள்முதல் விலை அதிகரித்துக் காணப்படும் என்றும், அதன்பிறகு விலை குறைய வாய்ப்புள்ளது என்றும் அவர்கள் கணித்துள்ளனர்.