கரூர் சம்பவம்: அரசு பணி ஆணை ரத்து விவகாரம்.. உச்சநீதிமன்றத்தில் விசாரணைக்கு வரும் மேல்முறையீட்டு மனு!

கரூர் கூட்ட நெரிசலில் உயிரிழந்தவர்களின் குடும்பத்தினருக்குத் தமிழக அரசு வழங்கிய பணி நியமன ஆணைகளை உயர்நீதிமன்ற மதுரை கிளை ரத்து செய்திருந்த நிலையில், அந்த உத்தரவுக்கு எதிரான மேல்முறையீட்டு மனுவை வரும் ஆகஸ்ட் 14-ஆம் தேதி விசாரிப்பதாக உச்சநீதிமன்றம் அறிவித்துள்ளது.

கடந்த 2025 செப்டம்பர் 27 அன்று கரூரில் நடைபெற்ற தமிழக வெற்றி கழகத்தின் தேர்தல் பிரச்சாரக் கூட்டத்தில் ஏற்பட்ட கடும் கூட்ட நெரிசலில் சிக்கி 41 பேர் உயிரிழந்தனர். இந்தச் சம்பவம் தொடர்பாகச் சிபிஐ விசாரணை நடைபெற்று வரும் சூழலில், தொடர்ந்து நடைபெற்ற சட்டமன்றத் தேர்தலில் வெற்றி பெற்றுத் தமிழக வெற்றி கழகம் ஆட்சி அமைத்தது. முதலமைச்சராகப் பொறுப்பேற்ற விஜய், உயிரிழந்தவர்களின் குடும்பத்தினருக்கு அரசு வேலைக்கான பணி நியமன ஆணைகளை வழங்கினார்.

ஆனால், சிபிஐ விசாரணை இன்னும் நிறைவடையாத நிலையில் அரசு வேலை வழங்கியது சட்டத்திற்கு முரணானது எனக் கூறி வழக்கறிஞர் என். பிரபாகரன் தொடர்ந்த பொதுநல வழக்கை விசாரித்த உயர்நீதிமன்ற மதுரை கிளை, வழங்கப்பட்ட அரசுப் பணி நியமன ஆணைகளை ரத்து செய்து உத்தரவிட்டது.

உயர்நீதிமன்றத்தின் இந்த ரத்து உத்தரவை எதிர்த்துத் தொடரப்பட்ட மேல்முறையீட்டு மனுவே தற்போது உச்சநீதிமன்றத்தின் கவனத்திற்குச் சென்றுள்ளது.

உயிரிழந்தவர்களின் குடும்பங்களுக்கு வழங்கப்பட்ட அரசுப் பணி ரத்து செய்யப்பட்ட விவகாரம் தொடர்பான இந்த மனுவை வரும் ஆகஸ்ட் 14-ஆம் தேதி விசாரிப்பதாக உச்சநீதிமன்றம் தெரிவித்துள்ளதால், இதன் மீதான விசாரணை அரசியல் வட்டாரங்களில் எதிர்பார்ப்பை ஏற்படுத்தியுள்ளது.