தமிழக சட்டமன்ற கூட்டத்தொடர்... ஜனவரி முதல் வாரத்தில் தொடங்க வாய்ப்பு!

தமிழக சட்டமன்ற தேர்தல் அடுத்த ஆண்டு நடைபெற உள்ள நிலையில், ஜனவரி முதல் வாரத்தில் தமிழக சட்டசபை கூட உள்ளது. தேர்தலுக்கு முன் நடைபெறும் கடைசி ஆண்டுக்கான முதல் கூட்டத்தொடர் என்பதால், இது மிகுந்த முக்கியத்துவம் வாய்ந்ததாகப் பார்க்கப்படுகிறது.

தி.மு.க. ஆட்சியின் நிலை

2021 சட்டமன்றத் தேர்தலில் வெற்றி பெற்ற திராவிட முன்னேற்றக் கழகம் (தி.மு.க.), பெரும்பான்மையுடன் ஆட்சி அமைத்தது. மு.க. ஸ்டாலின் முதல் முறையாக முதலமைச்சராகப் பொறுப்பேற்றார். தி.மு.க. ஆட்சிப் பொறுப்பேற்று ஐந்து ஆண்டுகள் நிறைவு பெற உள்ளது. அடுத்த ஆண்டு ஏப்ரல் மாதத்திற்குள் சட்டமன்றத் தேர்தலை நடத்தி, புதிய அரசு பதவியேற்க வேண்டும் என்பதற்கான தேர்தல் பணிகளைத் தேர்தல் ஆணையம் மேற்கொண்டு வருகிறது. இந்த பரபரப்பான அரசியல் சூழ்நிலையில் தான், தமிழக சட்டமன்றக் கூட்டத்தொடர் நடைபெற உள்ளது.

சட்டசபைக் கூட்டத்தொடர் விவரங்கள்

தமிழ்நாடு சட்டமன்ற கூட்டத்தொடர் ஜனவரி முதல் வாரத்தில், குறிப்பாகப் பொங்கலுக்கு முன் தொடங்கவுள்ளதாகக் கோட்டை வட்டாரங்கள் தெரிவிக்கின்றன. ஆண்டின் முதல் சட்டமன்றக் கூட்டத்தொடர் என்பதால் இது ஆளுநர் உரையுடன் தொடங்கும். தேர்தலுக்கு முன் நடைபெறும் கடைசி ஆண்டுக்கான முதல் கூட்டத்தொடர் என்பதால், இது மிகுந்த முக்கியத்துவம் வாய்ந்ததாகப் பார்க்கப்படுகிறது.

இந்தக் கூட்டத்தொடர் ஒரு வாரம் வரை நடைபெற வாய்ப்புள்ளது. இதன் பின்னர் பிப்ரவரி மாதத்தில் பட்ஜெட் தாக்கல் செய்யப்பட வாய்ப்புள்ளது. எனினும், விரைவில் சட்டமன்றத் தேர்தல் நடைபெற உள்ளதால், தி.மு.க. அரசால் இடைக்கால பட்ஜெட்டை மட்டுமே தாக்கல் செய்ய முடியும். தேர்தல் நெருங்கி வருவதால், இந்தக் கூட்டத்தொடரில் ஆளுங்கட்சியின் சார்பில் மக்களைக் கவரும் வகையில் புதிய அறிவிப்புகள் வெளியிடப்படவும் வாய்ப்பு இருப்பதாகத் தலைமைச் செயலக வட்டாரங்கள் தெரிவிக்கின்றன.