LIVE 24 X 7
நடிகர் விஜய் அரசியலுக்கு வந்து தமிழக வெற்றிக் கழகத்தைத் தொடங்கி ஆட்சியைப் பிடித்துவிட்டார். இப்போது அடுத்த நடிகர் யார் அரசியல் களத்துக்கு வரப்போகிறார் என்ற எதிர்பார்ப்பு கோலிவுட்டில் மட்டுமல்ல, அரசியல் வட்டாரத்திலும் எகிறிக்கொண்டிருக்கிறது.
அந்த வரிசையில் நடிகர் தனுஷின் பெயரும் அடிபடத் தொடங்கியிருக்கிறது. இந்தச் சூழலில், “தனுஷ் அதிமுகவில் இணைந்தால் இருகரம் கூப்பி வரவேற்போம்” என்று முன்னாள் அமைச்சர் ராஜேந்திர பாலாஜி கூறியிருப்பது கவனத்தை ஈர்த்துள்ளது.
தனுஷ் அரசியலுக்கு வருகிறாரா?
நடிகர் தனுஷ் அரசியலுக்கு வரவிருப்பதாகவும், ‘தமிழக எழுச்சிக் கழகம்’ என்ற பெயரில் கட்சி தொடங்கி தேர்தல் ஆணையத்தில் பதிவு செய்திருப்பதாகவும் சமீபத்தில் சமூக வலைதளங்களில் தகவல்கள் பரவின.
இதற்கிடையே, கடந்த அக்டோபர் 15-ம் தேதி நடைபெற்ற தனுஷ் ரசிகர் மன்றக் கூட்டத்தில், இனி ரசிகர் மன்றங்கள் நற்பணி இயக்கமாகச் செயல்படும் என்று அறிவிக்கப்பட்டதாகக் கூறப்படுகிறது. இதற்கான கொடி மற்றும் லோகோவும் அறிமுகப்படுத்தப்பட்டதாகத் தகவல்கள் வெளியாகின.
ரசிகர் மன்றம் நற்பணி இயக்கமாக மாறுகிறது என்ற செய்தி ஒருபுறம் இருக்க, தனுஷ் அரசியலுக்கு வருவாரா என்ற கேள்வியும் மறுபுறம் எழுந்துள்ளது.
“அதிமுகவில் இணைந்தால் வரவேற்போம்!”
இந்தச் சூழலில்தான் சிவகாசியில் செய்தியாளர்களிடம் பேசிய அதிமுக முன்னாள் அமைச்சர் ராஜேந்திர பாலாஜி, தனுஷ் அதிமுகவில் இணைந்தால் வரவேற்போம் என்று தெரிவித்துள்ளார்.
அதிமுகவில் யார் இணைந்தாலும் அவர்களை ஏற்றுக்கொள்ளும் பக்குவம் பொதுச்செயலாளர் எடப்பாடி பழனிசாமிக்கு இருப்பதாகக் குறிப்பிட்ட அவர், கட்சியின் வளர்ச்சிக்கு உதவக்கூடியவர்கள் யாராக இருந்தாலும் அவர்களை இணைத்துக்கொள்வார் என்றும் கூறியுள்ளார்.
மேலும், இளைஞர்கள் மத்தியில் நடிகர் தனுஷ் நல்ல தாக்கத்தை ஏற்படுத்தக்கூடியவர் என்றும், அவர் அதிமுகவில் இணைய விரும்பினால் இருகரம் கூப்பி வரவேற்போம் என்றும் ராஜேந்திர பாலாஜி தெரிவித்துள்ளார்.
“அரசியலுக்கு வந்தால் நடிக்கக் கூடாது!”
அரசியலுக்கு நடிகர்கள் வருவதில் தவறில்லை என்று கூறிய ராஜேந்திர பாலாஜி, அரசியலுக்கு வந்த பிறகு நடிப்பதைத் தவிர்க்க வேண்டும் என்றும் கருத்து தெரிவித்துள்ளார். சிலர் திரைப்படங்களிலும் நடித்துக்கொண்டு அரசியலிலும் ஈடுபடுவதாக அவர் விமர்சித்துள்ளார்.
அதே நேரத்தில், தனுஷ் அதிமுகவில் இணைய விரும்புவதாகக் கூறப்படும் தகவல் உண்மையா அல்லது வதந்தியா என்பதை காலம்தான் பதில் சொல்லும் என்றும் அவர் குறிப்பிட்டுள்ளார்.
விஜய் அரசியலில் களமிறங்கியுள்ள நிலையில், தனுஷின் ரசிகர் மன்ற நடவடிக்கைகள் குறித்துப் பேசப்படும் இந்த நேரத்தில், அதிமுக தரப்பிலிருந்து வந்துள்ள இந்த வரவேற்பு கருத்து புதிய விவாதத்தைக் கிளப்பியுள்ளது.
இந்த நிலையில், தனுஷ் அரசியலுக்கு வந்து அதிமுகவில் இணைந்தால், அவருக்கு துணைப் பொதுச் செயலாளர் பதவிக் கொடுக்கப்படலாம் என்று கூறப்படுகிறது.
ஆனால், தனுஷ் அரசியலுக்கு வருவாரா? அதிமுகவில் இணைவாரா? அல்லது ரசிகர் மன்றத்தை நற்பணி இயக்கமாக மட்டுமே தொடர்வாரா? இதற்கான பதிலை தனுஷ் தான் சொல்ல வேண்டும்.
