உலகம்

டிரம்புக்கு ஸ்கெட்ச் போட்ட பாகிஸ்தானி நபர் ! தட்டித்தூக்கிய FBI ! அதிரடி காட்டிய நீதிமன்றம் !

By Santhosh V
18 Nov 2026, 09:10 AM
அமெரிக்க அதிபர் டொனால்ட் டிரம்பைக் குறிவைத்து தீட்டப்பட்டதாகக் கூறப்படும் கொலைச் சதித்திட்டம் தொடர்பான வழக்கில், பாகிஸ்தானைச் சேர்ந்த ஆசிஃப் மெர்ச்சன்ட்டுக்கு 27.5 ஆண்டுகள் சிறைத்தண்டனை விதித்து அமெரிக்க நீதிமன்றம் அதிரடி தீர்ப்பளித்துள்ளது. இந்த வழக்கின் பின்னணியில் வெளியாகியுள்ள அதிர்ச்சித் தகவல்கள் சர்வதேச கவனத்தைப் பெற்றுள்ளன.

அமெரிக்க அதிபர் டொனால்ட் டிரம்பை கொலை செய்ய சதித்திட்டம் தீட்டியதாகக் குற்றம்சாட்டப்பட்ட பாகிஸ்தானைச் சேர்ந்த ஆசிஃப் மெர்ச்சன்டுக்கு அமெரிக்க நீதிமன்றம் 27.5 ஆண்டுகள் சிறைத்தண்டனை விதித்துள்ளது. ஈரான் ராணுவத் தளபதி காசிம் சுலைமானி கொல்லப்பட்டதற்குப் பழிவாங்கும் நோக்கில் இந்தச் சதித்திட்டம் தீட்டப்பட்டதாக அமெரிக்க விசாரணை அமைப்புகள் தெரிவித்துள்ளன.

காசிம் சுலைமானி கொலை... பழிவாங்கத் திட்டம்!

கடந்த 2020ஆம் ஆண்டு அமெரிக்க ராணுவம் நடத்திய ஆளில்லா விமானத் தாக்குதலில் ஈரானின் முக்கிய ராணுவத் தளபதியான காசிம் சுலைமானி கொல்லப்பட்டார். இந்தச் சம்பவத்துக்குப் பழிவாங்கும் நோக்கில் அமெரிக்காவின் முக்கிய அரசியல் தலைவர்களைக் குறிவைத்து தாக்குதல் நடத்தத் திட்டமிடப்பட்டதாகக் கூறப்படுகிறது.

இந்தப் பின்னணியில், பாகிஸ்தானைச் சேர்ந்த 48 வயதான ஆசிஃப் மெர்ச்சன்ட் கடந்த 2024ஆம் ஆண்டு அமெரிக்காவுக்குச் சென்றுள்ளார். அங்கு ஈரானின் இஸ்லாமிய புரட்சிகர பாதுகாப்புப் படையுடன் தொடர்பு கொண்டு, அமெரிக்க அதிபர் டொனால்ட் டிரம்பைக் கொலை செய்வதற்கான சதித்திட்டத்தில் ஈடுபட்டதாக அவர் மீது குற்றச்சாட்டு முன்வைக்கப்பட்டது.

டிரம்ப் உள்ளிட்ட தலைவர்கள் குறிவைப்பு!

ஆசிஃப் மெர்ச்சன்ட் தயாரித்ததாகக் கூறப்படும் தாக்குதல் திட்டத்தில் டொனால்ட் டிரம்ப் முதன்மையான இலக்காக இருந்ததாக அமெரிக்கத் தரப்பில் தெரிவிக்கப்பட்டது. மேலும், அப்போதைய முன்னாள் அதிபர் ஜோ பைடன் மற்றும் முன்னாள் ஐ.நா. தூதர் நிக்கி ஹேலி ஆகியோரின் பெயர்களும் இலக்குகளின் பட்டியலில் இடம்பெற்றிருந்ததாகக் குற்றச்சாட்டு எழுந்தது.

இதற்காக அமெரிக்காவில் கூலிப்படையினரை அணுகிய ஆசிஃப், டிரம்பைக் கொலை செய்வதற்கு சுமார் 5 லட்சம் ரூபாய் வழங்குவதாகப் பேசியுள்ளார். ஆனால், அவர் அணுகிய நபர்கள் உண்மையான கூலிப்படையினர் அல்ல. அவர்கள் அமெரிக்காவின் மத்திய புலனாய்வு அமைப்பான எஃப்.பி.ஐ.யுடன் தொடர்பில் இருந்தவர்கள்.

கூலிப்படை வேடத்தில் வந்த எஃப்.பி.ஐ!

ஆசிஃப் மெர்ச்சன்ட்டின் நடவடிக்கைகள் குறித்து தகவல் கிடைத்ததும், அவரை ரகசியமாகக் கண்காணித்த எஃப்.பி.ஐ அதிகாரிகள், கூலிப்படையினர் போல வேடமிட்டு அவரைச் சந்தித்துள்ளனர்.

அப்போது டிரம்பைக் கொலை செய்வதற்கான திட்டம் தொடர்பாகப் பேச்சுவார்த்தை நடத்திய ஆசிஃப், முன்பே ஒப்புக்கொண்ட தொகையான சுமார் 5 லட்சம் ரூபாயை அவர்களிடம் வழங்கியுள்ளார். இதையடுத்து, திட்டமிட்டபடி செயல்பட்ட எஃப்.பி.ஐ அதிகாரிகள் அவரைக் கைது செய்தனர்.

குற்றத்தை ஒப்புக்கொண்ட ஆசிஃப்... நீதிமன்றம் அதிரடி!

கைது செய்யப்பட்ட ஆசிஃப் மெர்ச்சன்ட் மீது அமெரிக்காவில் வழக்குத் தொடரப்பட்டது. ஈரானின் இஸ்லாமிய புரட்சிகர பாதுகாப்புப் படையுடன் இணைந்து அமெரிக்க அரசியல் தலைவர்களைக் கொலை செய்யச் சதித்திட்டம் தீட்டியதாக அவர் மீது குற்றச்சாட்டுகள் முன்வைக்கப்பட்டன.

இந்த வழக்கின் விசாரணையின்போது, சதித்திட்டத்தில் ஈடுபட்டதை ஆசிஃப் ஒப்புக்கொண்டதாக அமெரிக்க நீதித்துறை தரப்பில் தெரிவிக்கப்பட்டது. இதையடுத்து, 2026ஆம் ஆண்டு மார்ச் மாதம் அவர் குற்றவாளி எனத் தீர்மானிக்கப்பட்டார்.

தொடர்ந்து நடைபெற்ற தண்டனை தொடர்பான விசாரணையில், கூட்டாட்சி நீதிமன்ற நீதிபதி எரிக் ஆர். கோமிட்டீ, ஆசிஃப் மெர்ச்சன்ட்டுக்கு 330 மாதங்கள், அதாவது 27.5 ஆண்டுகள் சிறைத்தண்டனை விதித்து உத்தரவிட்டார்.

சதித்திட்டத்தில் ஈரானுக்குத் தொடர்பா?

இந்தச் சம்பவத்தின் பின்னணியில் ஈரான் இருப்பதாக அமெரிக்கத் தரப்பில் குற்றச்சாட்டுகள் முன்வைக்கப்பட்டுள்ளன. குறிப்பாக, ஈரானின் புரட்சிகர பாதுகாப்புப் படையுடன் ஆசிஃப் தொடர்பில் இருந்ததாகக் கூறப்படுகிறது. இருப்பினும், டிரம்பைக் கொலை செய்வதற்கான சதித்திட்டத்தில் ஈரானுக்குத் தொடர்பு இருப்பதாகக் கூறப்படும் குற்றச்சாட்டுகளை ஈரான் மறுத்துள்ளது.

அமெரிக்க அதிபரைக் குறிவைத்து நடத்தப்பட்டதாகக் கூறப்படும் இந்தச் சதித்திட்டம் தொடர்பான வழக்கில், பாகிஸ்தானியருக்கு 27.5 ஆண்டுகள் சிறைத்தண்டனை விதிக்கப்பட்டிருப்பது சர்வதேச அளவில் கவனம் பெற்றுள்ளது.