அம்பானியுடன் கை கோர்க்கும் அமெரிக்கா...குறிவைக்கப்படும் வெனிசுலா எண்ணெய்!
இந்தியாவின் முன்னணி தொழிலதிபரான முகேஷ் அம்பானியை, அமெரிக்க வெளியுறவுத்துறை அமைச்சர் மார்கோ ரூபியோ சந்தித்துப் பேசியிருப்பது கவனம் பெற்றுள்ளது.
குஜராத்தின் ஜாம்நகரில் உள்ள ரிலையன்ஸ் நிறுவனத்தின் பிரம்மாண்ட எண்ணெய் சுத்திகரிப்பு வளாகத்துக்குச் சென்ற அவர், வழக்கமான எரிசக்தி மற்றும் புதிய எரிசக்தித் துறைகளில் இரு நாடுகளுக்கும் இடையிலான வர்த்தக ஒத்துழைப்பை விரிவுபடுத்துவது குறித்து ஆலோசனை நடத்தியுள்ளார்.
அமெரிக்கத் தூதர் செர்ஜியோ கோரும் இந்தப் பயணத்தில் ரூபியோவுடன் சென்றார். உலகின் மிகப்பெரிய எண்ணெய் சுத்திகரிப்பு வளாகமாகக் கருதப்படும் ஜாம்நகர் தொழிற்சாலைப் பகுதியை அமெரிக்கக் குழுவினர் பார்வையிட்டதாக ரிலையன்ஸ் நிறுவனம் தெரிவித்துள்ளது.
இந்தியாவுக்கு வெனிசுலா கச்சா எண்ணெய்... அமெரிக்காவின் திட்டம் என்ன?
இந்தியாவுக்கான எரிசக்தி ஏற்றுமதியை அதிகரிப்பது, மேற்கத்திய நாடுகளில் இருந்து கிடைக்கும் கச்சா எண்ணெயைச் சுத்திகரிப்பது மற்றும் ரிலையன்ஸ் நிறுவனத்துடனான முதலீட்டு உறவுகளை வலுப்படுத்துவது ஆகியவற்றில் அமெரிக்க அதிபர் டொனால்ட் டிரம்ப் நிர்வாகம் கவனம் செலுத்தி வருகிறது. இதன் ஒரு பகுதியாகவே ரூபியோவின் ஜாம்நகர் பயணம் அமைந்துள்ளது.
இதற்கு முன்னதாக செய்தியாளர்களிடம் பேசிய ரூபியோ, வெனிசுலாவில் இருந்து கிடைக்கும் கச்சா எண்ணெயைச் சுத்திகரிப்பதில் இந்தியா முக்கியப் பங்காற்ற முடியும் என்று தெரிவித்திருந்தார். இதுதொடர்பாக ரிலையன்ஸ் நிறுவனத்துடன் பேசவுள்ளதாகவும் அவர் குறிப்பிட்டார்.
கனமான கச்சா எண்ணெயைச் சுத்திகரிக்கும் திறன் ரிலையன்ஸ் நிறுவனத்துக்கு ஏற்கெனவே இருப்பதாகக் கூறிய ரூபியோ, இந்தியாவை எரிசக்தி சுத்திகரிப்பில் முக்கிய சக்தியாகவும் வர்ணித்தார். வெனிசுலாவின் எண்ணெய் விநியோகம் அதிகரிப்பது உலகச் சந்தைக்கு ஓரளவு நிவாரணம் அளிக்கலாம் என்றும், ஆனால் பிற பகுதிகளில் ஏற்படும் விநியோகத் தடைகளை முழுமையாக ஈடுசெய்ய முடியாது என்றும் அவர் கூறினார்.
எரிசக்தி மட்டுமல்ல... டேட்டா சென்டர்களிலும் கூட்டணி!
ஜாம்நகரில் நடைபெற்ற ஆலோசனையின்போது, ரிலையன்ஸ் நிறுவனத்தின் எதிர்காலத் திட்டங்கள் குறித்தும் அமெரிக்க அதிகாரிகளிடம் விளக்கப்பட்டதாகத் தெரிவிக்கப்பட்டுள்ளது.
புதிய எரிசக்தி உற்பத்திக்கான பிரம்மாண்ட ஆலைகள் கட்டம் கட்டமாகச் செயல்பாட்டுக்கு வருவது, கட்டப்பட்டு வரும் டேட்டா சென்டர்கள் மற்றும் டிஜிட்டல் உள்கட்டமைப்பில் மேற்கொள்ளப்படும் முதலீடுகள் குறித்து ரிலையன்ஸ் தரப்பில் எடுத்துரைக்கப்பட்டது.
முகேஷ் அம்பானி மற்றும் ஆனந்த் அம்பானி ஆகியோர், ஜாம்நகர் வளாகத்தை நவீனத் தொழில்நுட்பம், புதுமை மற்றும் மேம்பட்ட உற்பத்திக்கான முக்கிய மையமாக உருவாக்கும் நீண்டகாலத் திட்டங்களைப் பகிர்ந்துகொண்டதாக நிறுவனம் தெரிவித்துள்ளது.
மலிவான மற்றும் நம்பகமான எரிசக்தி விநியோகம், தொழில்நுட்ப முன்னேற்றம், தடையற்ற விநியோகச் சங்கிலி மற்றும் அதிகரித்து வரும் தேவையைச் சமாளிக்கத் தேவையான முதலீடுகள் குறித்தும் இரு தரப்பினரும் ஆலோசித்துள்ளனர்.
டேட்டா சென்டர்களின் வளர்ச்சிக்கும் டிஜிட்டல் பொருளாதாரத்தின் விரிவாக்கத்துக்கும் நிலையான மின்சார விநியோகம் அவசியம் என்பதால், எரிசக்தி மற்றும் டிஜிட்டல் உள்கட்டமைப்பு இடையிலான ஒத்துழைப்புக்கான வாய்ப்புகளும் விவாதிக்கப்பட்டுள்ளன.
அமெரிக்காவிலும் ரிலையன்ஸ் முதலீடு!
அமெரிக்காவில் எரிசக்தித் துறையில் ரிலையன்ஸ் மேற்கொள்ளும் முதலீடுகளும் இந்தச் சந்திப்பின் பின்னணியில் கவனம் பெற்றுள்ளன.
டெக்சாஸ் மாகாணத்தின் பிரவுன்ஸ்வில்லில், அமெரிக்கா ஃபர்ஸ்ட் ரிஃபைனிங் நிறுவனம் உருவாக்கத் திட்டமிட்டுள்ள நாளொன்றுக்கு 1,68,000 பேரல் சுத்திகரிப்புத் திறன் கொண்ட எண்ணெய் சுத்திகரிப்பு நிலையத்தில் ரிலையன்ஸ் நிறுவனம் தொடர்புடைய முதலீட்டை மேற்கொண்டுள்ளது. அமெரிக்காவில் உற்பத்தி செய்யப்படும் லைட் ஷேல் கச்சா எண்ணெயைச் சுத்திகரிக்கும் வகையில் இந்த ஆலை திட்டமிடப்பட்டுள்ளது.
இந்தத் திட்டம் நிறைவேறினால், சுமார் ஐந்து தசாப்தங்களுக்குப் பிறகு அமெரிக்காவில் உருவாகும் முதல் பெரிய புதிய எண்ணெய் சுத்திகரிப்பு நிலையமாக இது அமையும் எனத் தெரிவிக்கப்பட்டுள்ளது. மேலும், இந்த ஆலையில் சுத்திகரிக்கப்படும் பொருட்களை நீண்டகால ஒப்பந்தத்தின் அடிப்படையில் வாங்கவும் ரிலையன்ஸ் ஒப்புக்கொண்டுள்ளது.
இந்தச் சந்திப்பு குறித்து அமெரிக்கத் தரப்பில் தெரிவிக்கப்பட்டுள்ள கருத்துகளின்படி, இந்தியாவின் எரிசக்தித் தேவைகளைப் பூர்த்தி செய்வதற்கான மாற்று விநியோக வழிகளை விரிவுபடுத்துவதும், இரு நாடுகளின் தொழில்நுட்ப மற்றும் முதலீட்டு ஒத்துழைப்பை அதிகரிப்பதும் முக்கிய நோக்கங்களாக உள்ளன.
எண்ணெய் சுத்திகரிப்பு முதல் புதிய எரிசக்தி, டேட்டா சென்டர்கள் வரை பல துறைகளில் ஒத்துழைப்புக்கான வாய்ப்புகள் ஆராயப்பட்டுள்ள நிலையில், இந்தியா–அமெரிக்க வர்த்தக உறவில் எரிசக்தித் துறை முக்கிய இடத்தைப் பிடித்துள்ளது.