கேரள மாநிலம் இடுக்கி மாவட்டத்தில் உள்ள ஒரு ஹோட்டலின் கழிவுத் தொட்டியை (செப்டிக் டேங்க்) சுத்தம் செய்யும் பணியில் ஈடுபட்டிருந்த தமிழ்நாட்டைச் சேர்ந்த மூன்று தொழிலாளர்கள் மூச்சுத்திணறி உயிரிழந்த சம்பவம் நேற்று (செவ்வாய்க்கிழமை) அதிர்ச்சியை ஏற்படுத்தியுள்ளது.
விபத்து நடந்தது எப்படி?
கழிவுத்தொட்டியைச் சுத்தம் செய்வதற்காக முதற்கட்டமாக ஒரு தொழிலாளி ஆள் நுழைவுத் துளையினுள் (Manhole) இறங்கினார். விஷவாயு தாக்கம் காரணமாக அவர் உள்ளே சிக்கித் தவித்துள்ளார்.
உள்ளே சிக்கிய தொழிலாளியைக் காப்பாற்றுவதற்காக, மற்ற இரண்டு தொழிலாளர்களும் துளையினுள் இறங்கினர். ஆனால், அவர்களும் விஷவாயு தாக்கி வெளியே வர முடியாமல் உள்ளேயே மயங்கி விழுந்தனர்.
இதனையடுத்து, தகவலறிந்து வந்த மீட்புக் குழுவினர், உடனடியாக ஆள் நுழைவுத் துளையினுள் இறங்க முடியவில்லை. இதன் காரணமாக, உடல்களை மீட்கப் பெரும் போராட்டம் நடந்தது. முடிவில், புல்டோசர் (Earthmover) இயந்திரத்தை வரவழைத்து, கழிவுத் தொட்டியை இடித்து, மூன்று தொழிலாளர்களின் உடல்களையும் மீட்புக் குழுவினர் மீட்டனர்.
உயிரிழந்தவர்கள் தமிழ்நாட்டைச் சேர்ந்தவர்கள் என்றும், இந்தச் சம்பவம் குறித்து இடுக்கி போலீசார் வழக்குப் பதிவு செய்து விசாரித்து வருகின்றனர் என்றும் தெரிவிக்கப்பட்டுள்ளது.