ஏறுமுகத்தில் தங்கம், வெள்ளி விலை.. நகைப்பிரியர்கள் அதிர்ச்சி!

சர்வதேச பொருளாதாரச் சூழல்களுக்கு ஏற்பத் தங்கத்தின் விலை நாள்தோறும் மாற்றியமைக்கப்பட்டு வருகிறது. கடந்த சில நாட்களாகவே ஏற்ற இறக்கங்களைச் சந்தித்து வந்த ஆபரணத் தங்கத்தின் விலை, தற்போது தொடர்ந்து உயர்ந்து வருகிறது.

கடந்த 10-ஆம் தேதி ஒரு கிராம் தங்கம் ரூ.13,950-க்கும், சவரன் ரூ.1,11,600-க்கும் விற்பனை செய்யப்பட்டது. தொடர்ந்து உயர்ந்து வந்த தங்கம் விலை, 18-ஆம் தேதி சவரன் ரூ.1,14,320-ஐ எட்டியது.

அதன்பின்னர் நேற்று முன்தினம் காலையில் சவரனுக்கு ரூ.680 குறைந்து ரூ.1,13,640-க்கு விற்பனையானாலும், மாலையிலேயே அதிரடியாகச் சவரனுக்கு ரூ.1,560 உயர்ந்தது. அந்த விலை உயர்வு நேற்றும் நீடித்து, சவரனுக்கு ரூ.1,600 அதிகரித்து ரூ.1,16,800-க்கு விற்பனையானது.

அந்தத் தொடர் உயர்வின் நீட்சியாக இன்றும் தங்கத்தின் விலை அதிகரித்துள்ளது. அதன்படி, சென்னையில் 22 கேரட் ஆபரணத் தங்கத்தின் விலை கிராமுக்கு ரூ.110 உயர்ந்து ரூ.14,710-க்கும், சவரனுக்கு ரூ.880 உயர்ந்து ரூ.1,17,680-க்கும் விற்பனை செய்யப்படுகிறது.

தங்கத்தைப் போலவே வெள்ளி விலையும் இன்று உயர்ந்துள்ளது. கிராமுக்கு ரூ.5 உயர்ந்து ஒரு கிராம் வெள்ளி ரூ.265-க்கும், கிலோவுக்கு ரூ.5,000 உயர்ந்து ஒரு கிலோ பார் வெள்ளி ரூ.2,65,000-க்கும் விற்பனையாகி வருகிறது.