இந்திய கிரிக்கெட் அணியின் முன்னாள் வீரர் தினேஷ் கார்த்திக்கின் வீட்டின் பின்புறம் உள்ள அக்கரை கடற்கரையில், வாயில் டேப் ஒட்டப்பட்ட நிலையில் ஓர் இளைஞரின் சடலம் கரை ஒதுங்கிய சம்பவம் பெரும் பரபரப்பை ஏற்படுத்தியுள்ளது. இந்தச் சம்பவம் கொலையா அல்லது தற்கொலையா என்ற கோணத்தில் நீலாங்கரை போலீசார் தீவிர விசாரணை நடத்தி வருகின்றனர்.
சம்பவம் மற்றும் சடலம் மீட்பு
கிரிக்கெட் வீரர் தினேஷ் கார்த்திக்கின் வீடு சென்னை, அக்கரை கடற்கரையை ஒட்டி அமைந்துள்ளது. நேற்று முன்தினம் அவரது வீட்டின் பின்புறம் உள்ள கடற்கரைப் பகுதியில் அடையாளம் தெரியாத ஓர் இளைஞரின் சடலம் கரை ஒதுங்கிக் கிடந்துள்ளது. தகவல் அறிந்து சம்பவ இடத்திற்கு விரைந்து வந்த நீலாங்கரை போலீசார் விசாரணை நடத்தினர். சடலமாகக் கிடந்த அந்த இளைஞரின் வாயில் 'டேப்' ஒட்டப்பட்ட நிலையில் இருந்ததால் பரபரப்பு ஏற்பட்டது. உடனே, போலீசார் அவரது உடலைப் பிரேதப் பரிசோதனைக்காக ராயப்பேட்டை அரசு மருத்துவமனைக்கு அனுப்பி வைத்தனர்.
அடையாளம் மற்றும் விசாரணை
அவரது அருகில் இருந்த சோல்டர் பையை போலீசார் சோதனை செய்தனர். சோதனையில் சடலமாகக் கிடந்தவர் வேலூர் மாவட்டத்தைச் சேர்ந்த கலையரசன் (33) என்பது தெரியவந்தது. உடல் அழுகிய நிலையில் இருந்ததால், காயங்களை உடனடியாகப் போலீசாரால் கண்டுபிடிக்க முடியவில்லை. கலையரசனின் சகோதரிக்கு போலீசார் தகவல் தெரிவித்துள்ளனர். போலீஸ் விசாரணையில், கலையரசன் கடந்த ஒரு வருடமாக வேலை தேடிச் சென்னைக்கு வந்ததாகவும், அவருக்குத் திருமணமாகி மனைவியைப் பிரிந்து வாழ்ந்ததும் தெரியவந்தது.
வாயில் டேப் ஒட்டப்பட்ட நிலையில் சடலம் மீட்கப்பட்டதால், அவர் தற்கொலை செய்துகொண்டாரா அல்லது யாரேனும் அவரைக் கொலை செய்து கடலில் வீசினரா என்ற கோணங்களில் நீலாங்கரை போலீசார் தீவிர விசாரணை நடத்தி வருகின்றனர்.