தமிழகத்தில் புதிய ஆட்சி அமைப்பதில் தொடர்ந்து இழுபறி நீடித்து வரும் நிலையில், தமிழக வெற்றிக் கழகத் தலைவர் விஜய் இன்று மூன்றாவது முறையாக ஆளுநரைச் சந்திக்க உள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
தமிழகச் சட்டமன்றத் தேர்தலில் 108 இடங்களைப் பிடித்த தமிழக வெற்றிக் கழகம், காங்கிரஸ் கட்சியின் 5 சட்டமன்ற உறுப்பினர்களின் ஆதரவையும் சேர்த்து மொத்தம் 113 இடங்களுடன் ஆட்சி அமைக்க உரிமை கோரியுள்ளது. இருப்பினும், பெரும்பான்மைக்குத் தேவையான 118 இடங்கள் இல்லை என்ற காரணத்தால் ஆளுநர் அர்லேகர் இதுவரை ஆட்சி அமைக்க விஜய்க்கு அழைப்பு விடுக்கவில்லை. இதற்கிடையே, திமுக மற்றும் அதிமுக இணைந்து ஆட்சி அமைக்கப் போவதாக வெளியாகும் தகவல்கள் தவெக தரப்பினரிடையே அதிருப்தியை ஏற்படுத்தியுள்ளன.
ஆளுநர் மாளிகையில் மீண்டும் சந்திப்பு
நேற்றைய தினம் ஆளுநரைச் சந்திக்க விஜய் சென்றபோது, சுமார் 30 நிமிடங்கள் காத்திருக்க வைக்கப்பட்டார். அந்தச் சந்திப்பின்போது, வரும் 10-ஆம் தேதிக்குள் 118 எம்.எல்.ஏ-க்களின் ஆதரவைப் பட்டியலாக வழங்கினால் மட்டுமே ஆட்சி அமைக்க அழைக்க முடியும் என்று ஆளுநர் நிபந்தனை விதித்ததாகத் தெரிகிறது. இந்த நிலையில், இன்று மாலை 4.30 மணியளவில் கிண்டியில் உள்ள ஆளுநர் மாளிகையில் ஆளுநரை விஜய் மீண்டும் சந்திக்க உள்ளார்.
முடிவு என்ன? எதிர்பார்ப்பில் தமிழகம்
பாஜகவின் விருப்பத்திற்கேற்ப அதிமுகவை ஆட்சிப் பீடத்தில் அமர்த்த ஆளுநர் முயல்வதாக ஒருபுறம் விமர்சனங்கள் எழுந்துள்ள சூழலில், இன்றைய சந்திப்பு மிக முக்கியமானதாகக் கருதப்படுகிறது. 113 இடங்களை வைத்துள்ள தவெக-விற்கு ஆட்சி அமைக்க முன்னுரிமை அளிக்க வேண்டும் என்றும், பெரும்பான்மையைச் சட்டமன்றத்தில் நிரூபிக்கத் தயாராக இருப்பதாகவும் விஜய் மீண்டும் வலியுறுத்துவார் என எதிர்பார்க்கப்படுகிறது. 10-ஆம் தேதி கெடு நெருங்கி வருவதால், இன்றைய சந்திப்பிற்குப் பிறகு ஆளுநர் எடுக்கும் முடிவே தமிழகத்தின் அடுத்த அரசைத் தீர்மானிக்கும் என்று தெரிகிறது.