மாதம்பட்டி பாகசாலா நிறுவனம் தொடர்பாக வெளியிட்ட பதிவுகளை நீக்கிவிடுவதாக ஜாய் கிரிசில்டா தரப்பில் நீதிமன்றத்தில் உத்தரவாதம் அளிக்கப்பட்டுள்ளது.
ஜாய் கிரிசில்டாவுக்கு எதிராக வழக்கு
திருமண மோசடி விவகாரத்தில் மாதம்பட்டி ரங்கராஜுக்கு எதிராக ஜாய் கிரிசில்டா தனது சமூக வலைதளப் பக்கங்களில் பல்வேறு பதிவுகளை வெளியிட்டு வந்தார். இந்தப் பதிவுகளில் ரங்கராஜின் தனிப்பட்ட விவகாரங்களோடு, அவரது நிறுவனமான 'மாதம்பட்டி பாகசாலா' பெயரையும் இணைத்திருந்தார்.
இதற்கு எதிர்ப்புத் தெரிவித்து அந்த நிறுவனம் சார்பில் சென்னை உயர்நீதிமன்றத்தில் வழக்குத் தொடரப்பட்டது. இந்த வழக்கு நீதிபதி செந்தில்குமார் ராமமூர்த்தி முன்னிலையில் விசாரணைக்கு வந்தபோது, நிறுவனத்தின் சார்பில் ஆஜரான வழக்கறிஞர் விஜயன் சுபிரமணியன் ஒரு முக்கிய வாதத்தை முன்வைத்தார்.
அதாவது, ரங்கராஜுக்கு எதிரான தனிப்பட்ட கருத்துகளில் நிறுவனத்தின் பெயரைத் தேவையில்லாமல் இணைத்ததால், அந்த நிறுவனத்திற்குப் பெரும் நிதி இழப்பு ஏற்பட்டுள்ளதாகத் தெரிவித்தார். இதனைத் தொடர்ந்து, ஜாய் கிரிசில்டா தரப்பில் ஆஜரான வழக்கறிஞர் தீபிகா, மாதம்பட்டி பாகசாலா நிறுவனத்தைச் சம்பந்தப்படுத்தி வெளியிடப்பட்ட பதிவுகள் அனைத்தையும் இன்னும் இரண்டு வார காலத்திற்குள் சமூக வலைதளங்களிலிருந்து நீக்கி விடுவதாக நீதிமன்றத்தில் உறுதி அளித்தார். இதனைப் பதிவு செய்துகொண்ட நீதிபதி, நிறுவனம் சார்பில் தொடரப்பட்ட வழக்கை முடித்து வைத்தார்.
மேல்முறையீடு மற்றும் நீதிமன்றத்தின் அதிரடி உத்தரவு
இதற்கிடையில், ரங்கராஜ் தனிப்பட்ட முறையில் ஜாய் கிரிசில்டாவுக்கு எதிராக அவதூறு பதிவுகளை வெளியிட இடைக்காலத் தடை விதிக்கக் கோரி தாக்கல் செய்த மனுவை நீதிமன்றம் ஏற்கனவே தள்ளுபடி செய்திருந்தது. இந்த உத்தரவை எதிர்த்து மேல்முறையீடு செய்ய உள்ளதாக ரங்கராஜ் தரப்பில் தெரிவிக்கப்பட்டது.
தொடர்ந்து இந்த வழக்கை விசாரித்த நீதிபதி, இருவருக்கும் இடையிலான நீண்ட காலப் பிரச்னைக்குச் சுமூகத் தீர்வு காணும் வகையில் ஒரு மத்தியஸ்தரை நியமிக்க முடிவு செய்தார். இதற்காக ஓய்வுபெற்ற உயர்நீதிமன்ற நீதிபதி அல்லது மூத்த வழக்கறிஞர் ஒருவரின் பெயரைப் பரிந்துரைக்குமாறு இரு தரப்பினருக்கும் அவர் உத்தரவிட்டார். இதன் மூலம் ஒரு பொதுவான உடன்பாட்டை எட்ட முடியும் என்று நீதிமன்றம் கருதுகிறது.
அடுத்தகட்ட விசாரணை எப்போது?
தற்போது நிறுவனத்தின் பெயர் தொடர்பான சிக்கல் முடிவுக்கு வந்துள்ள நிலையில், ஜாய் கிரிசில்டாவுக்கு எதிராக மாதம்பட்டி ரங்கராஜ் தாக்கல் செய்துள்ள பிரதான வழக்கின் விசாரணை மட்டும் நிலுவையில் உள்ளது. இந்த வழக்கின் அடுத்தகட்ட விசாரணையை வரும் பிப்ரவரி 9-ம் தேதிக்குத் தள்ளிவைத்து நீதிபதி உத்தரவிட்டுள்ளார்.