துபாயில் இருந்து இஸ்ரேலின் டெல் அவிவ் நகருக்குச் சென்ற 'ப்ளைதுபாய்' (flydubai) விமானத்தில், விமானத்தைக் கீழே வீழ்த்த முயன்ற உதவி பைலட்டைத் தடுத்து நிறுத்தி, 174 பயணிகளின் உயிரைக் காப்பாற்றிய இந்திய பைலட் ஸ்மித் மச்சாருக்கு பிரதமர் நரேந்திர மோடி பாராட்டு தெரிவித்துள்ளார்.
நடுவானில் நடந்த திடுக்கிடும் சம்பவம்
துபாய் சர்வதேச விமான நிலையத்திலிருந்து புறப்பட்ட FZ 1073 ரக விமானம், இஸ்ரேல் வான்வெளியை நெருங்கிக் கொண்டிருந்தது. அப்போது, உதவி பைலட் திடீரென விமானத்தின் இயங்குதளங்களை முடக்கி, அதை விபத்துக்குள்ளாக்க முயன்றுள்ளார்.
அவரைத் தடுக்க முயன்ற தலைமை பைலட் ஸ்மித் மச்சாரை, அந்த உதவி பைலட் கத்தியால் குத்தியுள்ளார். இதனால் இருவருக்கும் இடையே கடும் மோதல் ஏற்பட்டது. இதற்கிடையே விமானம் இரண்டு நிமிடங்களில் சுமார் 17,400 அடி உயரத்திற்குக் கீழே இறங்கியது. உடனடியாக காக்பிட் பகுதிக்குள் நுழைந்த விமான ஊழியர் ஒருவரும், பயணியும் சேர்ந்து தாக்குதல் நடத்திய உதவி பைலட்டை மடக்கிப் பிடித்தனர். பின்னர் விமானம் கட்டுப்பாட்டிற்குள் கொண்டுவரப்பட்டு, சவுதி அரேபியாவில் உள்ள ஒரு விமானநிலையத்தில் பாதுகாப்பாகத் தரையிறக்கப்பட்டது.
பயணிகள் பாதுகாப்பு மற்றும் விசாரணை
இந்த விமானத்தில் 27 குழந்தைகள் உட்பட மொத்தம் 174 பயணிகள் பயணித்தனர். இதில் இந்தியா, இஸ்ரேல், ஐக்கிய அரபு அமீரகம் மற்றும் அமெரிக்காவைச் சேர்ந்த பயணிகள் அடங்குவர். நல்வாய்ப்பாகப் பயணிகள் அனைவரும் எவ்வித காயமுமின்றி பாதுகாப்பாகப் மீட்கப்பட்டனர்.
தாக்குதலில் ஈடுபட்ட உதவி பைலட்டைச் சவுதி காவல்துறை கைது செய்து விசாரணை நடத்தி வருகிறது. இந்த விசாரணையில் இஸ்ரேலும் இணைந்து கொள்ளும் எனத் தெரிவிக்கப்பட்டுள்ளது. இச்சம்பவத்தையடுத்து இஸ்ரேலுக்கான தனது விமான சேவைகளை ப்ளைதுபாய் நிறுவனம் தற்காலிகமாக நிறுத்தி வைத்துள்ளது.
வீரமிக்க பைலட் ஸ்மித் மச்சார்
குஜராத்தைச் சேர்ந்த 33 வயதான ஸ்மித் மச்சார், போயிங் 737 ரக விமானங்களை இயக்குவதில் 13 ஆண்டுகளுக்கும் மேலான அனுபவம் கொண்டவர். ஆரம்பத்தில் ஜவுளிப் பொறியியல் மற்றும் மேலாண்மைப் படிப்புகளைப் படித்த இவர், தனது 19-வது வயதில் விமானியாகும் ஆசையால் நியூசிலாந்தில் பயிற்சி பெற்றார்.
இந்தியாவின் ஸ்பைஸ்ஜெட் நிறுவனத்தில் 10 ஆண்டுகள் பணியாற்றிய பிறகு, கடந்த 2022-ஆம் ஆண்டு முதல் ப்ளைதுபாய் நிறுவனத்தில் கேப்டனாகப் பணியாற்றி வருகிறார். இவருடன் இவருடைய சகோதரரும் இதே நிறுவனத்தில் பைலட்டாகப் பணியாற்றி வருகிறார் என்பது குறிப்பிடத்தக்கது.
பிரதமர் மோடி பாராட்டு
இந்திய பைலட்டின் இந்த துணிச்சலான செயலைப் பாராட்டி எக்ஸ் தளத்தில் பதிவிட்டுள்ள பிரதமர் நரேந்திர மோடி, "கேப்டன் ஸ்மித் மச்சார் ஒரு உண்மையான நாயகன். படுகாயமடைந்த நிலையிலும் அஞ்சாமல் செயல்பட்டு நூற்றுக்கணக்கான உயிர்களைக் காப்பாற்றியுள்ளார். இந்தியா அவரை நினைத்துப் பெருமை கொள்கிறது. அவர் விரைவில் குணமடைய இறைவனைப் பிரார்த்திக்கிறேன்" எனக் குறிப்பிட்டுள்ளார்.